Bashkia e Tiranës nëpërmjet një plani konkret synon të kthejë Piramidën në një Qendër Kulturore të hapur 24 orë për qytetarët. Kryebashkiaku, Erion Veliaj mblodhi artistë, arkitektë dhe qytetarë, ndërsa prezantoi objektivat për ta kthyer godinën e ndërtuar si Muze për diktatorin, në një vend ku zhvillohen koncerte apo teatër.
Prej pasditës së të premtes, Piramida e lënë në harresë dhe në prag amortizimit të plotë do të kthehet në një Qendër Kulturore e hapur 24 orë për publikun.
Kryebashkiaku, Erion Veliaj mblodhi arkitektë, artistë, studentë dhe qytetarë për të diskutuar mbi një plan konkret, që synon ta kthejë godinën një një hapësirë kulturore.
Veliaj: Sot, kemi këtë trashëgimi, e ruajtur nga shkatërrimi dhe demolimi total, për një projekt që fatmirësisht nuk ndodhi kurrë dhe qyteti e shpëtoi këtë hapësirë publike dhe ajo që dua t’ju them sot është se angazhimi ynë publik si Bashki e Tiranës, tani që e kemi marrë në administrim është që t’ia kthejmë publikut. Nuk do jetë një projekt privat, nuk do të kemi një dhënie me koncension, nuk do kemi një investim privat sepse ne besojmë se duhet të ngelet një vepër autentike publike e qytetit të Tiranës dhe të atyre që do të duan ta mbushin me jetë.
Veliaj tha se Piramida do të jetë një destinacion për turistët e huaj që vizitojnë kyeqytetin.
Veliaj: Tirana duhet të jetojë edhe me art e kulturë. Më vjen mirë që këtë e kemi përmirësuar, por mendova se kishte ardhur koha që siç ka bërë Amsterdami, Zyrihu, Parisi dhe më në fund Londra, të jemi qyteti i pestë në Evropë që do të kemi një kryetar bashkie për natën, që nuk është më shumë një post burokratik formal, me shkresa, por në thelb është një individ, bashkë me një ekip, i cili sigurohet që Tirana jeton 24 orë.
Piramida e cila ishte konceptuar si Muze për dikatatorin Enver Hoxha, me planin e ri të Bashkisë synon të kthehet në një qendër kulturore ku mund të zhvillohen koncerte apo teatër.
